أنماط شخصيات الاطفال

💕بمناسبة بوست الشخصية قوية الإرادة 💕

حاحكي ليكم يوم عمر ولدي ضربني🤛
اي زول يقول لينا سميتوا عمر استحملوا لازم ياخد من عمر بن الخطاب ان شاءالله ياخد كله

عمر هسا ستة سنوات حمله كان صعب جدا تعبت في أوله و آخره و اتولد كان بكاي شديد ما بسكت نهايء لو خليته ساعة ممكن يواصل بكاء و بدور بي ١٠ طوالي ماف مقدمات لي درجة مرة رسلت لي امي فيديو هو ببكي لمن قلبها اتقطع قالت لي اختي الولد دا ما يشوفوا مالو ، اختي قالت ليها عايني اخوانه مسترخين كيف حوله معناها الوضع دا طبيعي عندهم 🤣🤣🤣🤣

و انا اصلا ما النوع البشيل ولا عندي زمن اصلا لاني كنت في بلد اروبي ولا عندي اي مساعدة و عندي طفلين غيره في مدرسة
و بعد بقي اربعة شهور رجعنا السودان التغيير و التوتر برضو ضغطوا علي اعصابي و جيت حملت بعد بقي سنة نص حمل ما متوقع و زاد التوتر و طبعا هو طبعه ماشي اصعب عناد و صريخ و للاسف انا بقيت اطلع من طوري اضربه و دا ازم الامور زيادة…….
بعد ولدت بدينا حرب الغيرة و انفعالات ما مسببة و تمادي في العناد و الاستفزاز …..
و اخوه الصغير كبر و بقي شخصية لطيفة كل الناس بتحبه و عمر حس انه هو الوحيد الصعب في البيت ،هو الوحيد الطبعه مختلف هو الوحيد الاتضرب (و دي حقيقة) و صنف نفسه انه هو الوحيد الكعب …..

و بالرغم من علاقته الممتازة ما شاءالله بي اواب لكن الي الان كل ما يغضب بنفس غضبه فيه حتي لو زعلان مني انا لان الناس كتير بتفضل التعامل مع اخوه الصغير و بتوددوا ليه دا احتمال غيره لسا مترسخة جواه او بس تنفيس في زول أضعف منه .

في ايام الكرونا دي و مع الضغط النفسي حق الحبسة مع اني كنت مجتهدة معاهم شديد في البرامج لكن يوم كدا انفعل شديد و رفض يعمل حاجة طلبتها منه و كان ليه ٣ يوم سلوكه ما كان لطيف و بنفعل و كل يوم بزيد انفعاله و زي ما بقولوا الخواجات بضغط علي ازراري عشان انفجر و بقينا كاننا في نفس المعركة حقت منه حيفوز فينا انا ولا هو

لحد ما انا خلاص قربت انكسر سقته اوضته قلت ليه لو عايز تغضب من حقك لكن ما من حقك تضايق الناس و تزعجهم و تخوفهم بي غضبك
( احنا عادة طوالي بنعمل كدا و هو بمشي الأوضة حقته يجدع المخدات ينفس عن روحه و بعد شوية بجي يعتذر )

يعني انا ما قاعدة استنكر عليه انه يغضب نهايء و بديه مساحته عشان ينفس بس ما يأذي نفسه ولا الحوله و كمان بنحاول اول شيء نعمل تمارين التنفس، حتي هو زاته لمن انفعل في زول تاني مافيه هو اكيد ههههه
بقول لي يا ماما اخدي نفس عميق 🤣🤣 واحد اتنين شهيق زفير🤣🤣🤣🤣 عشان في المدرسة علموهم كدا.

لكن اليوم داك انفعل زيادة عن اللزوم لي درجة بقي يعاين لي في عيوني و يقول لي اضربيني..
و قلت ليه انت متخيل اني انا ما حاقدر اضربك انا بقدر لكن انا عارفة انه غلط و ما حيحل المشكلة
و انا خلاص علي حافة الانهيار بالجد كان نفسي اضربه لكن كنت وقفت ضرب تماما الحمدلله من فترة طويلة لكن للاسف هو طلع ما ناسي اني كنت بضربه و هو صغير او سمعني و انا بتكلم مع زول و بقول اني كنت بضرب عمر ما متأكدة …

رفع يده قال لي لو ما ضربتيني انا حاضربك قلت ليه لو شايف ان دا صح و حيريحك اضربني (ماعارفة كان صح ولا غلط) …
و صدمني و فعلن ضربني بي كل قوته و اكيد ما كانت حاره

لكن انا بعدها طوالي انهرت و قعدت ابكي 😭😭😭😭
جرا علي طوالي حضني قال لي انت ضربتيني و انا صغير، قلت ليه ايوا و انا اسفة و انا برضو ضربت عوض وهو صغير و هسا انا اتغيرت و عرفت و قررت اني ما اضرب تاني…….

انا كنت فاهمة مشكلته انه حاسي انه طبعه مختلف لان اخوانه هاديين ،غير انه في النص طبعا و هو النوع المستقل بعمل حاجاته براه ممكن يلعب براه خياله واسع و اخوه الصغير مرتبط بي شديد ملصق فيني اليوم كله و اي نشاط بنعمله بنكون مع بعض احنا التلاته قصة بالليل، لعب برا ،او رسم او فلم

💜هو محتاج زمن ليه براه معاي 💜
فاول يوم ضربني فيه اتخذت قرار انه يكون مرة في الأسبوع او اسبوعين علي حسب الظروف يكون عندنا date انا و هو برانا برا البيت ….
نقعد في محل آيسكريم او كافيه يتكلم فيه براه من غير اي مقاطعة من اخوانه اسمعه كويس يتكلم عن اي شيء مضايقه او مفرحه…
بالجد بعدها حسيت الإختلاف في طريقته…….
لان زي ما قال الكتاب هم ما حيسمعوا ليك لو ما وثقوا فيك ،و احنا ما حنكسب ثقتهم بفرض الاوامر بس لا بي اننا نحسسهم بي اننا فاهمين مشاعرهم و مقدرنها

ما حاقول ليكم كان حل سحري و هسا هو بقي ملاك🤣🤣
لا طبعه هو طبعه صعب عايز مجهود و ترتيب للحوار لان كلمة واحدة ممكن طوالي تاخده للطريق المعاكس
(يعني مثلا التهديد نهايء ما بشتغل معاه بالعكس بتحداك زيادة، التحفيز بجيب نتيجة احسن
لو كسرت قانون بتتعب معاه شديد عشان هو بركز و بختها ليك 🤣🤣 لانه هو بحترم القانون فما ممكن فجاءة اجي اغير رأي ..

التربية صعبة ،و الطفل قوي الإرادة صعب شديد لكن بس لو الواحد خت في باله انه عنده كنز و انه طفلي دي مشروع انسان مميز حتكوني حريصة جدا علي تفاصيل التعامل معاه…
و لو برضو اتذكرتي انه في عمر صغير انك تدربي نفسك و تدربي طفلك علي طريقة تعرفوا تتعاملوا بيها هسا مع بعض اسهل بي كتيييييير من المعاناة الممكن تعيشيها معاه لمن يبقي مراهق
و الله المستعان ❣💕💕💕

بحلم انه يجي يوم يبقي زول مهم و قائد يجي يحكي اول مرة ضربت امي ساقتني في date 🤣 و دا كان من اسباب نجاحي 🤣🤣🤣🤣🤣

خلونا نحلم ياخ يبقي علينا تعب بس

ربنا يفرحنا بيهم يارب و يعوض تعبنا فيهم خير

إيمان محمود أمين
رواندا كيجالي 2020