ازيكم ..نواصل ما انقطع من حديث موضوع الأطفال الكبار ٧-١٥ معقد شوية و حيفتح علي جهات كتيرة ….
الحاجات الممكن يعملوها الأيام دي علشان يشغلوا نفسهم كتيرة لكن بتعتمد علي ميولهم ما حنقدر نفرض عليهم برامج معينة أو نشاطات معينة لكن الخط العام نفسه لي اخوانهم الصغار و لينا احنا نفسنا
💞 الرياضة
💞نشاط اكاديمي
💞 مساعدة في المنزل
💞 ممارسة هواية
💞 الونسة مهمه شديد لان هم خلاص بكونوا بدوا يبعدوا ما زي العمر الصغير هو البكون ساكيك عايز يتونس معاك فالونسة مع الكبار حاجة لازم نحن نبادر بيها (ونسة ما تحقيق و زرزرة)
…
الاعمار دي طبعا متمردة جدا علشان كدا من البداية تجيبوا ورقة و قلم و ترموا الكورة في ملعبهم يلا كل واحد فيكم يوريني برنامجه حق اليوم حيكون شنو بالساعة لو ما مقنع ليك ممكن تقدم مقترحات لو رفضوها خليهم اصلا يوم يومين حتقدر تثبت ليهم ان برنامجهم محتاج تعديل، و لما هم يضعوه التزامهم بيكون أكبر و بتريحوا رأسكم من النقة و من unfair البنسمعاها اليوم كله لانهم ما حيقولوها لان هم أصحاب خطة اليوم……..
يعني انا عملوا لي خطة ليهم وولي اخوانهم و راعوا الزمن الانا اكون شغالة معاهم يكون زمن لعب لي اخوانهم…
طيب نجي للتفاصيل 💢
❣ الرياضة تمارين صباحية رقيص او كورة اوي اي حاجة هم بحبوا يعملوها و حتكون احلي و امتع لو شاركتوا فيها بالاخص الاباء انا عندي زول ما بحب الرياضة فبدخلها ليه في زمن مسؤوليات البيت ان يعمل تمارين لي اخوانه الصغار او يلعب معاهم كورة و كدا بكون ضربت عصفورين بحجر عمل رياضة حتي لو خفيفة و قدم مساعدة في شغل البيت ….
❣ النشاط الأكاديمي الناس العندها دروس اون لاين طبعا برنامجها واضح، الناس المدارسها مؤجلة محتاجين يراجعوا علشان ما ينسوا
من الحاجات الكنت دايما بطلب من عوض (١٣سنة) انه يعملها انه يعمل ملخصات لي الدروس الطويلة و انا بجي اسمع ليه من الملخص اها طبعا و الحمد لله اولادنا بقوا اخير مننا في التكنلوجيا😅 وراني حاجة ممكن تساعدكم كلكم حتي ناس الجامعات ان في ابلكيشنز الزول يعمل الملخص للدرس و البرنامج يعمل ليك اختبار صغير او quiz و فعلن حاجة فعالة و بتزيد من اعتمادهم علي نفسهم في التحصيل الدراسي و تخفف علينا العبء حانزله ليكم تحت …
❣ خلو يكون في زمن لمراجعة اللغات لانها بتتنسي نفس التطبيق ذكرته المرة الفاتت دوليقوز يعتبر احسن برنامج لتعليم اللغات يومي خلوهم يشتغلوا فيه نص ساعة أقل شيء…
❣مراجعة قرآن كريم ،تفسير،قصص أنبياء اي معلومة جديدة خلال اليوم نقرا قصة بالعربي لغير الناطقين بيها زينا كدا 😅 …
❣ زمن للقراءة اساااااسي ممكن يكون قبل النوم أو اي زمن يناسبكم في أسر بيتلموا كلهم و يقروا كتاب واحد عميق 😂كل زول بقرا جزء و يتناقشوا فيه ديل ناس راقيين مالينا بيهم دعوة🤣
انا عادة لمن نقرأ كتب دينية او كتب بالعربي عشان اسمع قرايتهم ممكن نتناقش في المحتوي رايهم فيه و لو اتذكرت زيادة معلومة يعني زمن الونسة ممكن ياخد اكتر من زمن القراية برضو حاجة كويسة…
❣ شغل البيت يتوزع والأمور تكون واضحة حتي لو تتعلق ورقة و البيتم شغلته يعمل تيك علشان ناس الخرخرة 🤣🤣 و عليكم الله الولد زي البت غسيل عدة مساعدة في الطبيخ تجهيز صفرة ،مساعدة في التزامات اخوانهم الصغار عايزين نربي جيل جديد بي مفاهيم سمحة. ما تخافوا عليهم من المطبخ و لا تخافوا علي المطبخ منهم 🤣 لو ما جاطوا و كسروا ووسخوا ما حيتعلموا و لمن يكبروا و يكونوا ما اتعودوا علي الشغل حنلومهم و حتكون غلطاتنا اننا ما طولنا بالنا و ما صبرنا عليهم ..و الشفقة نخليها يعني لو طلبنا منهم الحاجة و ما عملوها ما نحرد و نعملها احنا كدا حنريحهم خالص خالص ….
❣ الألعاب المشتركة كوشتينة ،دومينو ،جماد حيوان نبات ،ليدو ،مونوبولي ،كلمات متقاطعة، سودوكو ، من احسن الألعاب word scrabble ممتازة شديد لتقوية الاستهجاء زي الكلمات المتقاطعة كدا بس في بورد…taboo ممتازة خالص خالص بتزيد المصطلحات في منها مستويات كتيرة عبارة عن كروت كل كرت فيه كلمة لازم الناس تعرفها من غير ما تستعمل اقرب كلمات لوصف الكلمة المطلوبة، ،
وتذكروا زماااان كنا بنلعب فلم مسرحية غنية 🤣🤣🤣 مشت وين هسا
و المهم في دا كله ان مرة مرة تشاركوهم…
❣بالنسبة للتلفزيون و الفيديو قيمز طبعا عايز حسم شديد و تحديد زمن انا عارفاه صعب ما ساهل لكن ما نخليها مفتوحة أهم شيء قبل النوم أو يستحسن الساعة ٩ مثلا كل الأجهزة تتسلم في طربيزة برا غرف النوم و الما عايز ينوم يقرا كتاب…
اهم شيء ماف لابتوب يخش غرف النوم العايز يحضر
يحضر في السهلة😂😂 عيانن بيانن
فتشوا معاهم علي يوتيوبرز مفيدين و أطفال عندهم تجارب ناجحة عجبتني البت الصغيرة دي عندها صفحة في انستقرام بتنزل فيها طبخاتها. (الطبخات في الصور عملتهم فرح ١٠ سنوات)
❣ ياريت لو وقت شاي المغرب يكون وقت الأسرة تحضروا حاجة مشتركة مرة علي زوق الكبار مرة علي زوق الصغار علشان تعرف بحبوا شنو و تشاركوهم حتي لو بايخ استحمل و احضر معاهم علشان هم يقبلوا يحضروا معانا الاخبار والبرامج الوثائقية او اي شيء احنا نفسنا يشاركونا فيه ما تطالب من غير ما تدي. و تراعوا ان وهم حولكم ما تحضروا حاجة ما بتناسب اعمارهم….
❣ التجارب العلمية و الرسم الكروشية السنارات عمل اكسسوارات و اعملوا منافسات و مسابقات خلوهم يكتبوا مواضيع و يجوا مع شاي المغرب و الناس متلمة يقروها و تتناقشوا فيه ،،يعملوا عرض لي اي حاجة غنية مسرحية بحبوا العيال الحاجات دي
منافسات حتي مع أصحابهم في البيوت التانية و كل زول يرسل فيديو في الوتسب و الاهل يحكموا احلي شغل كان حق منو او احلي موضوع قدمه منو…
كنت عايزة اتكلم عن الكنترول علي التلفونات و التابلت لكن حسيت البوست حيبقي طويل شديد نخليه في بوست تاني 💞
ان شاء الله تكون افكار عملية تفيدكم كلكم، ، و زي ما قلنا المرة الفاتت ممكن كل تلاته يوم تعملوا فكرة لكن الحاجات البتعجبكم و بتناسبكم حاولوا تخلوها روتين يومي و ادوني افكار تانية
و الله ولي التوفيق
ايمان محمود
كيجالي ، رواندا
Comments are closed